Chapter 31: Bagian ka 31
amper 1 minggu Adit dan papinya dirumah sakit, ba jaga pa Arthur. Hari ini Adit baru maso ka sekolah, slama beberapa hari setelah pulang sekolah, Adit bolak balik
ka rumah sakit, dia baku ganti deng Krisna ba jaga pa Arthur.
Bela dan Ade pun skali-skali datang ba besuk pa dorang pe papa sambil bawa bunga yang Shinta titip pa dorang, karena Shinta nyanda bisa datang karna
sibuk ba kerja.
Arthur sejak dapa cilaka sampe skarang belom juga sadar dari dia pe tidor, dokter bilang kalo Arthur masih
dalam proses pemulihan paska ada dapa cilaka, perawat psecara berkala cek kondisi Arthur.
"Sus gimana kondisi kita pe paitua"
"torang belom bisa pastikan karna dia belom sadar-sadar untuk lebih jelas bisa tanya ka dokter yang rawat bapak pe paitua"
"baik nanti kita mo tanya ka dokter"
"kita misi dulu" kata suster itu setelah kelar ganti itu selang infus yang ada pasang di Artur pe lengan dengan yang baru.
Ketika dokter ba kunjung mo liat Arthur pe keadaan. Krisna lalu ba tanya ka dokter tentang kondisi terkini dia pe paitua
"Dok gimana keadaan kita pe paitua sekarang"
"dia pe kondisi saat ini pelang-pelang so mulai bae dan dia pe luka-lukanya juga so mulai kering tapi dia pe tulang kaki sadiki ta geser tapi masih bisa diperbaiki sedang dia pe kapala ada trauma ringan dan torang akan periksa ulang saat dia so sadar" dokter Luke beri penjelasan ka Krisna
"kalo bagitu kita mo permisi dulu"
"iyo dok makase"
Setelah amper dua minggu dirumah sakit akhirnya Arthur buka mata dan orang pertama yang dia cari Shinta, Bela deng Ade
"dimana kita, dimana kita pe bini deng kita pe anak anak" Arthur so sadar mar masi bingo
"pak Arthur so sadar" kata salah satu perawat yang kebetulan ada diruangan itu
"dimana ini?"
"bapak skarang lagi dirawat dirumah sakit karna kecelakaan"
"lalu dimana kita pe anak-anak"
"maaf pak kita nintau "
suster itu geleng kapala
"kalo bagitu kita pange dokter dulu for cek kondisi bapak"
nyanda lama kemudian Krisna datang, dia baru dari kantin, saat ba jaga dia pe suami Krisna pe puru ba bunyi jadi dia pamit pa dia pe paitua yang masih belom sadar-sadar dan pigi ka kantin for makang siang
"brur so sadar, syukurlah"
"kamu Krisna kan"
"iyo kita Krisna"
"dimana ngana pe paitua?"
"kita pe paitua?"
"iyo ngana paitua Arlan"
"Arlan so mati dan ngana yang ganti pa Arlan jadi kita pe paitua"
"nyanda, nyanda mungkin ngana kita pe paitua, panipu ngana!"
"brur kita ini ngana pe paitua"
"bukang, ngana bukang kita pe paitua, kita pe maitua Shinta"
"dokter, dokter" Krisna ba pangge pa dokter saat dokter itu maso ka ruangan
"tolong dok, kita pe laki, dia nyanda inga sapa kita, kita dia pe paitua dok"
"pak boleh tanang sadiki, kita mo periksa ini pasien"
Dokter segera periksa Arthur.
"suster ngana kase obat penenang dosis rendah ka ini pasien"
"baik dokter"
perawat itu pegang Arthur pe lengan dan suntik obat penenang dosis rendah dalam bentuk cair.
Nyanda lama kemudian Arthur so ta tidor
"Dok, giapa deng kita pe paitua? giapa dia nyanda inga pa kita?
"saya belom bisa pastikan, karna torang musti lakukan screening ka pasien"
esok lusa perawat bawa Arthur ka lab for scanning deng screening
"Setelah torang lakukan pemeriksaan terhadap pasien torang simpulkan bahwa suami ibu mengalami
amnesia temporary"
"dokter pe maksud"
"pasien, untuk sementara nyanda inga apa-apa karna
dia pe kapala mengalami benturan yang cukup karas saat kecelakaan deng itu bekeng dia trauma pa dia pe otak"
"jadi apa yang musti kita bekeng dok"
"pasien harus jalani terapi for kase bale ulang dia pe ingatan dan memori yang ilang"
"untuk sementara kita kase dulu vitamin dan suplemen for cegah kerusakan otak, minum 1 hari 3 kali habis makang" dokter Luke kase itu resep
"baik dokter makase"
Krisna pigi ka apotek for tebus tu obat for dia pe paitua
Akhirnya Arthur, dokter so boleh kase pulang ka rumah. Krisna kase tau itu kondisi Arthur dan minta
tolong ka Shinta agar dia ijinkan Arthur untuk sementara tinggal di Shinta pe rumah.
Adit heran giapa dia pe papa tiri nyanda kenali pa dia dan kiapa musti tinggal deng Shinta, Bella dan Ade pe mama. Lalu Adit ba tanya pa dia pe papi tentang problem ini
"pi giapa deng papa?"
"ngana pe maksud"
"giapa papa nyanda inga sama papi deng Adit?"
"giapa papa harus tinggal sama-sama deng tante Shinta?"
Krisna ta diang sabantar dengar pertanyaan dia pe anak lalu dia tarik dan buang napas
"gara-gara ngana pe papa ada cilaka, ngana pe papa nyanda inga apa-apa, dia lupa kalo kita dia pe paitua, dia lupa
kalo ngana dia pe anak"
"Dia cuma inga kalo Shinta dia pe istri, dia nyanda inga kalo dia deng dia pe mantan isteri so cere. Dia cuma
inga kalo Bela dan Ade dia pe anak-anak"
Adit kage, shock nyanda sangka ada dengar hal itu kaluar dari dia pe papi pe mulu sandiri. Dia pe Papi ma nangis dan Adit ta sadar lalu pelang-pelang ba dekat dan polo dia pe papi. Adit coba kase
tenang dia pe papi yang ma nangis ukur mampos dibahu Adit. Akhirnya dia tau kalo Arthur itu, Bela dan Ade pe papa, berarti ka dua kakak ade itu dia pe saudara tiri
Weekly Power Status
-- Power
Ranking 
-- Power
stone