Capítulo 29: Kabanata 29: Pag-Asa sa Himpapawid
Kabanata 29: Pag-Asa sa Himpapawid
Sa sumunod na araw, nagtipon ang grupo sa ilalim ng malaking puno sa gitna ng Hilltop Compound para sa isang meeting. Ang araw ay tahimik, ang paligid ay puno ng tunog ng kalikasan—tila kalmado, ngunit ang tensyon ng kanilang sitwasyon ay nananatili.
Tumayo si Mon, ang kanilang lider, sa gitna ng grupo. "Alam ko na lahat tayo ay iniisip ang ating mga mahal sa buhay. Hindi natin alam kung nasaan sila o kung ligtas pa sila. Kaya naisip ko na subukan nating mag-check gamit ang internet. Kung may signal o data pa sa lugar na ito, baka sakaling may impormasyon tayo makuha."
Saglit na katahimikan ang bumalot, hanggang sa magsalita si Vince, nakayukong nakatingin sa kanyang lumang cellphone. "Walang signal, Mon. Sinubukan ko na kanina pa. Kahit sa matataas na lugar, wala akong makuha. At ang problema pa, wala rin akong data. Kahit may signal man, hindi rin ako makaka-connect."
Napabuntong-hininga si Mon. "Ganun ba? No choice tayo. Ang tanging pag-asa natin ay makinig sa radyo para sa mga anunsyo ng gobyerno. Kung mayroong master list ng mga survivors, malamang i-announce nila 'yan sa mga himpilan ng radyo."
Tumayo si Shynie, hawak ang transistor radio na nakuha nila mula sa isang nakaraang misyon. "May nahanap akong radyo dati, pero kailangan nito ng bagong baterya. Kaya kung magagamit natin ito, baka may marinig tayo."
"Ano pang hinihintay natin? Joel, Vince, tulungan niyo akong hanapan ng baterya 'tong radyo," sabi ni Mon. Tumayo ang dalawa at agad sumama kay Mon sa loob ng isang storage room sa compound kung saan nila iniipon ang kanilang mga nahanap na kagamitan.
Habang naghahalughog sila, napansin ni Joel ang isang kahon ng lumang kagamitan. "Tignan mo ito," sabi niya habang hinuhugot ang ilang AA batteries. "Sana gumana 'to."
Agad nilang nilagay ang baterya sa radyo at sinubukan itong buksan. Tumunog ang static, isang malakas na ugong na nagbigay sa kanila ng pag-asa. Naghanap sila ng frequency, inaasahan na makakuha ng balita mula sa gobyerno o kahit anong impormasyon.
Pagbalik nila sa grupo, ini-adjust ni Shynie ang dial habang tahimik ang lahat. Sa wakas, may narinig silang tinig mula sa radyo.
"...pansamantalang evacuation centers ay nananatiling bukas sa mga piling lugar. Ang mga survivors ay pinapayuhang pumunta sa mga itinalagang safe zones. Ang mga detalye ng mga lokasyon ay ipapahayag tuwing alas-dose ng tanghali. Panatilihin ang pakikinig para sa karagdagang impormasyon..."
"Evacuation centers," sabi ni Rina, halos pabulong. "Baka nandoon ang pamilya ko."
"Baka," sagot ni Mon, "pero walang kasiguraduhan. Ang problema, ang malalapit na evacuation centers ay pwedeng puno na o, mas malala, hindi na rin ligtas."
"Dapat ba nating puntahan?" tanong ni Jake, ang isa sa mga gamer. "O baka mas mainam na maghintay tayo dito?"
Sandaling nag-isip si Mon bago sumagot. "Wala tayong kasiguraduhan. Pero kung may pagkakataon, maaaring magpadala tayo ng grupo para mag-check. Ang importante ngayon, manatili tayong ligtas dito sa Hilltop habang patuloy tayong nagkakalap ng impormasyon."
Habang nagpaplano sila, hindi maiwasan ng ilan na madismaya. Sa kawalan ng teknolohiya at komunikasyon, ang radyo na lamang ang natitirang koneksyon nila sa labas ng kanilang mundo. Ngunit kahit pa ito ay limitado, nagbigay ito sa kanila ng kaunting pag-asa na ang kanilang mga mahal sa buhay ay maaring buhay pa.
Status de energia semanal
-- Ranking de
Poder 
-- Pedra de
Poder