Chapitre 16: Chapter 16

TING!

Marahang lumabas si Leighana sa elevator nang huminto iyon sa palapag kung saan naroon ang unit ni Ziv. Pakiramdam niya ay babagsak na siya sa antok at pagod. Halos ay dalawang oras lang ang pagitan ng dalawang operasyon na isinagawa niya kahapon, na natapos kanina lamang alas-sais ng umaga ang huli. Wala pa siyang tulog at sa natatandaan niya'y kumain lang siya ng chicken sandwich kahapon bago magsimula ang pangalawang operasyon, na ni hindi naman niya naubos. Nakakadalawang kagat pa lamang yata siya ay binitiwan niya na ang kinakain. Parang ayaw tanggapin ng sikmura niya ang kinakain niya.

Napahagod siya sa balakang niya dahil pakiramdam niya ay nananakit iyon dala ng pagkangalay sa halos maghapon at magdamag na nakatayo siya sa harap ng operating table. Gustong-gusto niya nang ilapat ang katawan niya sa malambot na kama at kumuha ng kahit na kaunting tulog. Patang-pata talaga ang pakiramdam niya.