Capítulo 10: "Bisita"

Mula sa labas ay kita ni Miriam na maraming tao sa loob ng kanilang campus dahil nga sa nangyari. May mga ambyulansa, police, faculty at staff ng unibersidad, at iba pa na kakilala rin nina Miriam at Regina. Iba ay kaklase, iba ay kaibigan sa labas na ng paaralan. Dahil nga sa dami ng tao ay hindi tumuloy si Miriam. Sa halip ay naglakad siyang muli papuntang likod ng paaralan. Pagdating niya sa likuran ay nakakandado ang gate. Hinarap ng tulalang mukha ni Miriam ang bangkay na kaibigan na siya lamang ang nakakakita. Binuksan ni Regina ang nakasarang gate. Umangat ang kandado at nalaglag sa lupa at nagbukas nang kanya-kanya lamang ang gate. Pumasok si Miriam at dumiretso sa loob ng gusali. Naglakad siya sa hallway at umakyat gamit ang hagdan. Pumanhik siya patungong ikalawang palapag. Dumiretso sa pangatlo, umakyat pa sa pang-apat hanggang sa nakaabot siya sa huling baitang. Nakakandado din ang pinto papuntang rooftop. At muli binuksan ito ni Regina. At tuluyan na nga nilang naabot ang kanilang destinasyon. Naglakad si Miriam hanggang sa tanaw na niya ang mga tao sa baba. Nagtaka ang lahat sa imaheng kanilang nakikita sa kadulo-dulohan ng gusali.