Chapter 353: She's Crazy

Habang busy si Naomi sa pagiisip kung papaano siya makakaganti sa ginawa sa kanya ni Fely, si Fely naman ay umuusok ang tumbong at hindi mapakali sa loob ng kwarto nilang mag asawa.

"Pabayaan mo na at tataas lang ang presyon mo kung hahayaan mong manaig ang galit sa puso mo. Mas mabuti kang tao kesa sa kanya, wag mong ihalintulad ang sarili mo at wag kang bumaba sa level ng taong iyon." Pilit na pinakakalma ni Jessie ang mahal niyang asawa.

"Alam ko, pero hindi ko talaga mapigilan ang sarili ko na hindi magalit at kamuhian ang babaeng iyon. Isipin mo kung gaano kasama ang ugali. Ang ina at anak ay nakaratay sa hospital, pero siya may panahon pang manglait ng kapwa niya. Hay, naku! Kung hindi ko lang inaalala ang anak natin, hindi lang sampal ang inabot niya sa akin." Galit na sinabi ni Fely habang naghahanda ng matulog.